قطية الرونديك والعامية

بسم الله الرحمن الرحيم

قاعدين مع بعض كلنا
العم الظريف ( البيعرف كل حاجة )
كيف القراية معاكم
والله الحمد لله
ليكم كم من السودان
والله فترة كدا
بتعرف ( الحاجة ديك المابتعرفا )
.. ويا كثر الأسئلة الزي كده ..

.. في السودان ..
أرح لي ناس فلان
طيب أرح
السلام عليكم
كيف الحال
إنتا مش ود فلان الجايين ( مهما كانت )
أي بس هو
(هجوم طوالي ) كويس بتعرف في السودان شنو
أكيد بعرف عنها مش بلدي
طيب شنو معنى ( الحاجة ديك المابتعرفا )
والله ما عارف
ههههههههههههههه
طيب ( الحاجة ديك المابتعرفا ) برضو
والله ما ......
ههههههههههههههه

آآخ أنا آآخ
ذبنا نحنا كدا لاكين
ذبنا إنو ماأدوناا حاجتكم دي
في مدارسنا

المهم المهم
البوست داا عملتو عشان المآسي الزي كدا
ولا زم تختو يدكم معاي يدا بيد ( بكلم ناس الشهادات العربية أو السودانية الخارجية )
نعمل لينا أحلى مرجع للعامية ورونديك الشباب
ويديكم العافية
وبطلو جرسة وماتكبوا الزوغة من بدري وبإذن الله الشتات عندنا ما حاصل

قطية "الرونديك"
ارجو ان اراها هنا..

ونبدأ بإسم الله

أدوات الإنارة:
من أدوات الإنارة:-
1.حبوبة ونسيني وهي شيخ طه: وتتكون من خيط مبروم مسقي بالزيت ويشعل طرف الخيط كرمنسة سودانية بحتة.

2. الرتينة: وهي بت عم الفانوس الكبيرة وتوجد في بيوت الناس "الراحات".. ولها طقوس عجيبة عند الاشعال.. ويستعمل فيها الجاز الآبيض "الكيروسين" (نرجو مداخلة العلماء هنا

من الأكلات السودانية:-

ام تكشو: وتكنى "بالجديلة" وهي الخدرة البرية "البروس" بمعنى التي لا يزرعها انسان وانما تقوم كدا براها اول ما تنزل الأمطار.. ويصنع منها ملاح ام تكشو الذي يظبط مع وجود البصل والشطة الخدرة..

من مميزات اللهجة العامية السودانية.. ابدال الحروف.. ونستعين بكتاب بروف عون في ذكر المفردة الفصحى وما يقابلها من عاميتنا..

إبدال الحروف
جعيص : جعيس
كظم : كضم
جأر : جعر
سأل : سعل
فقأ : فقع
أين : وين
أديته : وديته
آمين : يامين
منبر : بنبر
ثلاثة : تلاته
حديث : حديس
جحش: دحش
جيش : ديش
حمزة : همزة
وجه : وش
خديجة:خجيجة
دجاجة : جدادة
حطّ : خت
زغرد : زغرت
ضنب : ذنب
زهري : ظهري
سرّة : صرّة
ذكر : زكر
ذمّه : زمه
شمس : شمش
رخيص : رخيس
سبق : صبق
ظل : ضل
ظهر : ضهر
وقت : وكت
قتل : كتل
فاطمة: فاطنة
والأمثال كثيرة مثل
الأسد : اللسد
كتابه : كتابو
وقت : وكت
لعن : نعل
ارتمى : اترمى
غطس : غتس

كرشوهو : طردوهو
خبتوهو : خبطوهو
هرشوهو : خوفوهو
بتنوهو ، كسروهو ، رشوهو : دقوهو
ردموهو ( في الكورة )، شلوهو : يعني وقعوهو واطة
جروا ليهو نور ، وحدروا ليهو : حمروا ليهو
خمشوا بنية : ضربو بنية
قبقبوهو : مسكوا من ثوبه
رصعو كف : أداهو كف
أم دلدوم : ضم القبضة والضرب بأسفلها في الظهر
أم سعد الله : الضرب في قمة الرأس
وا حاية أمك ، سجم أمك ، سجم خشمك : يعني موضوعك بايظ
ركب التونسية ، طيارتو حرقت : موضوعو باظ
إتلحس ، إنترم ، رقد ، إتكل على الله : مات
عمل زغبير ، كبر اللفة : زاغ

نحل: المتطفل الذي يتدخل في ما لا يعنيه وهو المتضهب وخصوصا في بيوت الأفراح بقصد الملح

نكتل الحفله: اي نهجج فيها ونرقص الى شروق الشمس

رقدو قش: دي عجيبة جد وما قادر اشرح ،، هي زي زاغو.. او استسلمو .. وهي شبيهة بقولهم (قالو الروب) والله أعلم..

جلوعة: بمعنى مرنوعه وبمعنى حنكوش لا يتحمل الهبشه.

جخس: الشخص الفائق البدانة مع الكسل وشيء من البلاهة الباردة.

بكاي: بمعنى جرسه ولا يستحمل رؤية الجمال فتبدو عليه أعراض أشبه ما تكون بالسحلبه المرافقة للملاريا الخبيثة..

المفراكة: هي عبارةعبارة عن عصا تنتهي بعود رفيع أو عودين تستخدم لتحرك الملاح أثناء طبخه.

الكنش: شكل من أشكال المفراكة المطورة وينتهي بقطعة من الخشي ذات شكل هلالي.

الككر: مقعد صغير الارتفاع من الارض.. وفي الأصل هو مقعد بهذه الشاكلة يستعمله سلاطين السودان القدماء في دارفور وفي مملكة العنج.

البنبر: مقعد منخفض قريب من الأرض يصنع من مختلف المواد.

الشرغرغ: يقابل البراد الآن ويصنع محليا من الصفائح الزنك او علب اللبن الفارغة ويستعمل في صنع القهوة قبل صبها في الجبنة.

كباية الشب:كباية مقاسها كبير أكبر من كباية الشاي المعتادة.

السعن :جلد كالقربة يستخدم في حمل الماء او اللبن وسيتعمل في صنع الفرصة.وابو السعن نوع من الطيور المهاجرة التي تأتي للسودان في فصل الخريف.

الفرصة: مشتق من مشتقات اللبن (الحليب يا اولاد المغتربين) حيث يوضع اللبن في السعن ويخض (يهز) اللبن بداخله وتتجمع الفرصة أو السمن.

القربة:عبارة عن كيس جلدي كبير الحجم توضع فيه مياه الشرب .

الصاج: قطعة مربعة من الحديد المطروق أو يستعمل لعواسة الكسرة والقراصة والفطائر والحلو مر والآبري.

الدوكة: مثل الصاج وتصنع من الفخار وتستعمل نفس استعمال الصاج .

البرش أو التبروقة أو التقروبة: مصلاية الصلاة وهي سجادة من السعف..

الدانقة:عبارة عن صالة بين غرفتين وعادة ما تكون طينية ..

السحارة: عبارة عن صندوق لوضع وتخزين حاجيات المنزل وهي بمثابة (الحافلة ) او الدولاب عند بنات الزمن دا.

المخلاية : جراب يستعمل لحمل الأغراض وتكون من القماش او من الصوف

الركوة: أبريق من الفخار.

المشلعيب: هو التلاجة الشعبية ويتكون من ثلاث شرائط من السعف تلتقي عند طرفيها وتوضع داخلها الكورة او غيرها من أواني حفظ الطعام وتعلق في الراكوبة بحيث تكون بعيدة عن متناول البهائم او الكدايس او الكلاب او الشفع الشرفانين الى محتوياته.

التيبار: هو الزير أو الجر أو ذلك وهو إناء فخاري يستعمل لحفظ الماء وتبريده وهو بمثابة (الديب فريزر)..

ايد الفندك (المدق) : يد حديدية تستخدم في سحن وطحن الأشياء في الفندك.

الجفير = بيت السكين او السيف
المشلعيب = يعني بمثابة التلاجه
والتلاجه زاتو سودانيه = الثلاجه او البراده
النضم = الكلام = الحديث
المرق = عود في العرش
عود = خشبه
العرش = السقف

الهبابة: أداة منزلية تنسج من السعف وتستعمل لنفخ الهواء فى النار في اول عملية إشعال النار.

الجبنة: وعاء يصنع من مواد مختلفة الزنك/ الصفيح/ الطين الفخار/ أو أي معدن مناسب.. وتستعمل لتقديم القهوة لشاربيها..

الجبنة: قد تستعار ويشبه بها الرأس الحليق تماما الخالي من الشعر (الصلعة) فيقال (حالق جبنة).. وقد يستعمل اللفظ كمجاز مرسل... فيقال (اتكيفت جبنة) أي بلغ الرضا تمامه..

الجنبة: أي الناحية او الطرف او الجهة فيقال ( ختيت الشيء الفلاني بالجنبة دي.. او في الجنبة ديك..

يكوضم = ياكل

ونوااصل بإاذن الله
cheers

بتساعدنا والله في الراب نفتش في كلمات

هع هع
راب راب
جننتنا
ياخي أمشي
إن شاء الله
تبقى وكيل عريف
هههههههههههههه
يسلموو
علىى
المررور
ياظرييف