الردحي مع النساء السودانيات

هييييييييييييييييييى و تاااانى هييييييييييى... و الما عندو
هييييييييييى يختف ليهوهييييييى ... و دى كانت آخر هييييييييى و أنا
ختفتها ... علقت هذه العبارة فى ذهنى منذ الطفولة ؛ و لعل سبب ذلك
يرجع للمتعة الحقيقية التى كنا نجدها عندما نكون حضوراً لإحدى ملاحم (
الرَدَحِى ) .. تلك الثقافة التى كانت تشغل حيّزاً مهماً من الحياة
اليومية للبيوت و الحارات السودانية ... و لعلها ما زالت كذلك فى بعض
الأنحاء لكنها عموماً تقلصت ممارستها و أصبحت مفرداتها مادة للهزل و
الترفيه أكثر من كونها وسيلة و سلاح عند مستخدمها لتأكيد الأفضلية
الإجتماعية ...و ( الرَدَحِى ) لمن لا يعرفونه هو طريقة من الطرق
الكثيرة) التى تستخدمها (النسوان) فى حروبهن و نزاعاتهن .. وهى طريقة
تعتمد أساساً على إستخدام فنون اللغة من سجع و طباق و مقابلة لإعطاء
الكلمات معنىً أكثر قوة ...... و هذه الكلمات بدورها منتقاة بعناية من
قِبل (الرادحة) لتؤكد علو مكانتها أو لِتحط من قدر رادحة أخرى ...وهو
ما يجعله ضرباً من ضروب الفنون تشتهر به الرادحات و (يتميزن به عن
باقى (النسوان) ال( بجم) اللآتى لا يستطعن الدفاع عن أنفسهن ... و
للحقيقة.. فخلال ملاحظتي فى العديد من البلدان -عربها و عجمها- لم أجد
شعباً له هذه الممارسة أو حتى مثلها من حيث ال (flow) أو ال
freestyle) .. ما عدا فى مصر فهى موجودة لكنها ليست بنفس الجودة ...و
أذكر فيما أذكر قديماً أنه كانت تسكن فى حىّ قريب من حي عمتنا في مدينة سناررادحة من
فطاحل الرادحات .. و فوق كونها كذلك فقد كانت كثيرة الجثة سميكة الجلد
وافرة اللحم كثيفة العظم واسعة الحلقوم كبيرة البلعوم لها جنازير
صوتية بدلاً من الحبال الصوتية .. كانت هذه المرأة (فتوة) النساء فى
ذلك الحى فكثيراً ما يلجأن لها لتأخذ بثأرهن .. بيد أنها كثيراً ما
تنفجر إذا شاغلتها إحداهن بكبرحجمها ف(تغُز) إحدى يديها فى وسطها
والأخرى ملوحةً بالمفراكة فتردح مفتخرةً
هييييييييييييي وتاني هييييييييييييييييييييييما تقيفى فى الزلط و
تتكلمى غلط
نحن نححححححححححححححمد الله الغدا ضأن.. و التحلية برتكان...
العشا حمام و التحلية شمّام .....و مليانيييييييييييين يا إنتى ...
لا كوع يقد الوسادة لا ساق يضبح الجدادة ...نحن تربية بيت و فرش
موكيت.... ....هيييييههههيييييييييى.... .... حليلكم إنتو يا ناس
الإشلاق يا الما سمعتو بى السيريلاك .... ....نببببببببرة و نستبرة و
ما نسكن جبرة... ...بششششششتنة و الناس متمحنة ... ..أوع من كدا و
الدنيا شتا ... .هيييييييييييييييييييييييى ...لا كرعيننا رقاق و لا
مولودين فى زقاق ..أولاد عوااااااااايل و عندنا فايل ....ولدونا فى
الإمتداد و حبّينا فى البلاط .. .نححححححححححححمدو..... البنريدو
بنولع ليو اللمبة.. و الما بنريدو بنحرش ليو الكلبة !! .. عشان كدا
أعملى لاين و أقيفى بهايند.... و أفهميها... أعملى شخيط و اقيفى بعيد
سجم و كمان عدم فهم ؟!! ...هييييييييييييييييى و تااانى
هييييييييييييى و تانى و تانى هيييييييييييييييييى....ما تكبى الريحة
و تعملى تفتيحة و تخلينا نقيف ليك فى طرف المعلقة و نوريك الصعلقة
كان جبل طلعناو و كان عسل لحسناو ..هووووووووووووى.... تنبزينى
أنا يا كرور يا وسخ الخور !!.. يا تربيزة الجزارة يا اللامّة الوسخ و
الزفارة !!بطااااااااطس و مستوى غااااااتس ....
هييييييييييييييييييىأخير ليييييك فتحى عينك قدر الريال و خلّى أضانك
قدر العقال ...ما تخلينى أدق الصفايح و أطلع الفضايح يا مرة يا
مجنونة يا شبه حجر الطاحونة ...يا ليمونة و عاملة فرعونة!!! ...
هيييييهييييييييييييييييييييييي .... غادى غادى الجزام بعادى . .. يا
الككوية يا أم جضوماً موية ...الشمس ضربتك و الرجال أبتك !!!!!
والله لا يرمينا في واحد مثلها. واحمد الله الجابني بلي

ملاح قرع وبامية مفروكة وكسرة وصحن سلطة و(ملاحة) ... ده كان الأكل فى بيوت البكا قبل أن يصبح (البكاء ذاتو) مظهر إجتماعى ونوع من أنواع (الفشخرة) بعد أن اجتاحت البلد أعداد مهولة من (المليارديرات الجدد) أصبحت تؤثر سلوكياً على بقية الطبقات الأخرى حتى صارت (الفاتحة) هى الفرق الوحيد بين الأتراح والأفراح!

عندما توفى رجل الأعمال (حسن يورو) قامت أسرته بفتح أبواب (الفيلا) الفاخرة لأفواج المعزين علاوة على (صيوان) ضخم نصب بطول الشارع العريض مزود بعدد مهول من مكيفات الهواء تغطى أرضيته (السجاد) لزوم (عدم الغبار وكده)!

عند موعد الغداء انتشر أفراد يرتدون زياً موحداً يحملون (صوانى الأكل) النيكل الناصعة التى ترتاح بداخلها أطباق المشويات والمحمرات والمقبلات وقطع الرغيف الفاخر بينما وضعت امام كل صينية عدد من زجاجات المياه المعدنية البااااردة!

فى صالون النساء جلست سوسو (فى الأصل ست البنات قبل أن يصبح حسن يورو رجل أعمال) جلست على سرير خشبى مستورد عليه ملاية قطيفة تتلقى التعازى من جاراتها وصويحباتها اللواتى جئن وهن فى كامل زينتهن (ناقشات) الحنة الما خمج يرتدين ثياب (الشيفون) المطرزة والشباشب ذات الكعب (البلية) تمتلئ أياديهن ورقابهن بآخر صيحات سوق الدهب فى (دبى) وبقية العواصم الخليجية!

- كلمتى (عوضية ردحى)؟

همست (سوسو) لجارتها وصديقتها (نوسة) والتى مالت قريبا منها وهى تجيبها:

- والله (عوضية ردحى) دى قالو عندها مناسبت بكاء فى (مدنى) سافرت مشت ليها، قمت مشيت لى (هاجر حى ووب) قالو ليا عندها إرتباط خارجى فى (دبى) فى واحد من ناس الجالية مات هناك أها فى الأخير مشيت كلمت ليكى (حنان سكليب) لقينا ما عندها ارتباط ووقعت العقد مع مدير أعمالا! وأديتو مليون عربون مقدم.

- وشالت منك البيانات!

- أديتا ليها كووولها.. المرحوم كان شغال شنو؟ وعندو كم عمارة؟ وقاعد يتبرع لى ياتو (نادى) وإشترى ليهم كم (لاعب)؟ وعربيتو الراكبا نوعا شنو؟ وموبايلو الشايلو موديلو كم؟

انتهت مجموعات النساء من تناول طعام الغداء الفندقى (الما خمج) ثم جئن لهن بالتحلية (باسطة وبسبوسة وكنافة وعين جمل وأم على) شئ باللوز وشئ بالجوز وشئ يالما بعرفو شنو داااك وبعد أن (ضربن) بدأن فى زحزحة الكراسى (البامبو) والجلوس كيمان كيمان (للشمارات) وهن يمسكن بثرامس الشاى (المذهبة) المتشابهة (الكبيرة حقت الشاى والصغيرة للجبنة) التى تفوح من (فناجينها) رائحة (المستكا)..

وفجأة دخلت إلى الصالون شابة (آخر شياكة) ذات مظهر يطابق كثيرا مظهر مغنيات هذا الزمان يمشى خلفها ستة (شابات آخريات) من نفس الشاكلة يرتدين زياً موحداً وهن يرفعن أياديهن عاليا فى حركات متتابعة ويصحن بصوت كالجرس يشق عنان السماء:

ووووب ووووب

وووووووووووووووووووووووووووووووووووووووووووووووب..

ثم تبدأ (حنان سكليب) فى السكلى و(الوصف) وهن يرددن خلفها:

- ووووب عليا والله ليا يا حسن يوروو يا البتدى البتدورو والما بتدورو

ووووب عليا والله يا صغير وجاهل يا البتجيب القروش بالساهل

يا ود امي.. هيء يء يء يء ..

الكورس : وووب ... وووب ...ووووووووب

الليله يا حليلك يا زين الرجال ياملك الدولار يا البتستر الحال

الليله يا حليلك يا البتشيل من البنوك وتشتت قبال ما يلحقوك

يا ود امي.. هيء يء يء يء ..

الكورس: وووب ... وووب ...ووووووووب

الليلة وينك إنتا يا الإسبليت هبوبك والهمر ركوبك

الليله وينك إنتا يا البنيت المقصورة وركبت النافورة

الليله وينك إنتا يا أب جيوب منفخة وأب عربية مصفحة

يا ود امي.. هيء يء يء يء ..

الكورس: وووب ... وووب ...ووووووووب

يا حليلك الليله يا البتفك الصعيبة ويا البتسجل اللعيبة

يا حليلك الليله يا جوكى البنوك يا التهريبك بالسنبوك

يا ود امي.. هيء يء يء يء ..

الكورس: وووب ... وووب ...ووووووووب

ثم تعدل (حنان سكليب) توبا الشفون (الترانسبيرنت) الكان واقع وتنظر للكورس خلفها نظرة الفنان الذى يود أن (يختم) الأغنية فيبدأن فى (تحرير) البكاء ويرفعن أصواتهن ويضربن بأياديهن ليبدين زينتهن (دهب دبى وكده) ... ووووووووووووب وب وب وب ووووووووب ثم يتوقفن فى لحظة واحدة بإشارة من (حنان سكليب)! التى تجلس على أقرب كرسى وتتناول علبة مناديل الورق وتخرج منديلين تمسح بهما حبات العرق التى تساقطت بفعل المجهود رغم برودة التكييف ثم تلتفت إلى النسوة اللواتى كن فى الصالون يتابعون (فاصل السكليب) قائلة:

- قبلكن وحدكن.. جنس بخلن عليكن .. أول مرة أمشى ليا (بيت بكا) ما ينقطوا ليا فيهو!!

ههههههههههههههههههههههههههههههههههههههه
والله مبالغه صح كلامك لكن الزمن دا البنات الجامعات خلو الردح زاتو عاملين فيها راقيات ديل بقو ناس ياي وهاى ولايلايل انسى بس عالم مركب بالغلط بقى
تقبل مرورى ميرفانا

يسلموو
عسلاية منتدانا
على المررورر الظريف داا
بس عاوز تعملوا لينا آكشن زي دا هنا
أمشي شوفي مشكلة مع صافي ولا دلوعة ولا بسمة
وأعملو دراما كداا
ههههههههههههههههه

( الله لا يجيب المشاكل )